中學文憑試今日放榜，喺怪獸家長橫行嘅香港，放榜日，佢哋分分鐘緊張過啲仔女。今年書展唔少新書就針對呢個現象特書一番，幾位趕上書展嘅作者噚日聚首一堂，論盡怪獸家長。
「鋼琴好似呼吸唔寫落履歷」
社會學家呂大樂寫咗本《家長焦慮症》，佢話當年為子女搵幼稚園兩、三間已好夠，家陣家長搵少過八間都唔常見，佢又聽聞𠵱家報考中學，講到明學鋼琴已經唔count係識玩樂器。陳惜姿就即時update資料，「鋼琴唔係樂器」呢個現象早已蔓延至小學，佢聽過家長搵學校時講：「鋼琴好似呼吸咁。你呼吸會唔會寫落履歷度？」
導演張堅庭話，現今社會生一個細路已經有中等焦慮，兩個就深度喇，三個可能會思覺失調。佢話，講到尾都係教育制度出事，反問設計呢個制度嘅一眾高官，有邊個嘅仔女喺傳統學校就讀？講到嬲嬲哋仲話教育局七成官員早應炒魷。佢仲話成日同個仔講，讀書唔好咁叻，升到班就算，唔使太chur。
同場介紹新書《佔領中環》嘅戴耀廷好似有啲格格不入，但佢話佔中商討原則可以應用喺家庭會議，同樣已為人父嘅戴笑言，家中都有建制派，所以要繼續「商討」。張堅庭被問到如果子女想去佔中點算？佢話如果夠18歲咪車埋佢去參與囉，不過佢講明自己唔會去，反而想拍部戲講佔中喎，唔知戲名會唔會係《佔中，你好嘢》？
李八方
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange