中央財經智囊、前央行貨幣政策委員李稻葵寸外資投行，夾硬整個「克強經濟學」。
指中國經濟能過難關
內地新領導層上任以來，大家翹首以待嘅刺激經濟措施冇影，投行巴克萊早排整個「李克強經濟學」（Likonomics），概括新總理李克強三大經濟學理念，即唔刺激、去槓桿同結構性改革。
新詞一出，隨即喺內地瘋傳，好多人開始擔心中國經濟前景。李稻葵身為智囊，終於發功，日前喺一個論壇上寸「國外的投行」「對中國經濟總的來看是比較空的」，整個「克強經濟學」，根本係「苦逼派」，覺得日子難過，經濟學必須幹三件苦事，批評咁樣係不切實際。
李稻葵力撐，結構調整唔係一味將速度減慢，好多問題需要保持一定速度，中國可以「保持一定速度的過程中闖過經濟難關」，而且不缺增長點㖭。唔知「克強經濟學」作者睇完有冇另一番體會呢？