【九龍灣】黃宗澤（Bosco）同胡杏兒甩拖後，雖然同「波波B」林穎彤傳緋聞，但煲極都係冇米粥，相反近日Bosco同宅男女神岑麗香合作拍無綫新劇《貓屎媽媽》，佢哋扮情侶有唔少親熱戲，唔知係咪怕又俾人傳擦出愛火花，前晚佢哋喺九龍灣拍外景時，戲外全程零交流玩避忌。
悶到發呆
前晚大約6點幾，Bosco、香香、胡定欣、張頴康同狄易達喺天橋等埋位，呢場戲講張頴康嘅手推車碌落樓梯，佢飛身撲救時跌埋落樓梯，香香同胡定欣嚇到O嘴，Bosco即刻衝上前去救人，狄易達就捉實張頴康雙腳，情況混亂一片。
唔知係咪有記者喺度，Bosco同香香全程表現非常咁避忌，香香成晚黐住胡定欣玩手機，有時又同工作人員講吓嘢，而Bosco雖然坐喺兩女嘅附近，但都冇走埋去傾偈打發時間，寧願一個人喺度發呆等埋位，間中用紙巾抹汗保持靚仔樣，睇嚟佢似乎俾緋聞嚇怕咗，唔敢埋身親近香香。
採訪、攝影：朱志聰、黃曉程、梁繼光
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！