魔獸重返英格蘭即風靡英倫！「魔獸」杜奧巴隨土耳其球隊加拉塔沙雷到英格蘭踢友賽，結果吸引嚟一大班車路士球迷捧場，個個都叫佢快啲再次做藍戰士，而其中一名球迷仲喺背脊度紋咗杜奧巴個樣；更有傳車路士教頭摩連奴都願意等呢名科特迪瓦國腳12個月，「魔獸」嘅魅力的確非凡。
車迷舉牌叫回歸
加拉塔沙雷喺上周六同主場嘅英甲球隊梳士貝利友賽，結果輕勝3:0。不過估唔到嘅係入場球迷以車路士粉絲居多，雖然加拉塔沙雷都算星光熠熠，有史奈達、卡森李察士、伊保爾及艾文達等球星，但呢班車仔粉絲，眼中就只有下半場入替嘅科特迪瓦前鋒杜奧巴。
喺杜奧巴未落場前，佢哋已經聚集喺加拉塔沙雷嘅後備席，又舉紙牌叫「魔獸」回歸車仔，而當杜奧巴喺下半場入替時，更掌聲雷動。喺賽後，呢班車仔粉絲當然一湧而上要杜奧巴簽名，其中一名球迷就更加出位，專登剝咗上衣，露出紋有杜奧巴個樣嘅背脊，走去同「魔獸」擁抱，又叫「魔獸」睇佢嘅紋身。
摩連奴願意等一年
其實唔單止車仔球迷對35歲嘅杜奧巴餘情未了，據報連回歸車路士嘅領隊摩連奴，亦好有興趣同魔獸再續前緣；英國《鏡報》話喺車路士未出發到泰國前，杜奧巴就去咗車路士探營，仲同摩佬密斟咗好耐，該報更話摩佬好有興趣簽番杜奧巴，但就唔多想俾轉會費，所以不惜等12個月，等「魔獸」同加拉塔沙雷滿約後，喺出年夏天簽佢！
雖然《鏡報》咁講有啲誇，但摩佬鍾意杜奧巴呢個係不爭嘅事實，佢早前就講：「我可以用杜奧巴呢個人辦，畀年輕球員作借鏡，因為杜奧巴喺我教車路士嘅第一日起，就一直跟隨我。」另外，盛傳有機會喺今夏加盟車仔嘅羅馬中場迪羅斯，則喺羅馬嘅夏季訓練營大軍名單中榜上無名，唔通真係去車仔好事近？
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange