港股上周五高開後急回，分明引淡友再沽，熊仔重貨區已殺清，再挾誘因甚低，發行商亦要時間再出新熊仔，故先行整固十分合理。觀乎個股動力充足，短期仍可睇高一線。
內地雲端遊戲商Forgame擬年內上市，科網股借勢又炒，網龍（777）逆市創新高，珠江船務（560）連出七支陽燭破埋3蚊關。據悉母公司將向珠船注入八個項目，包括南沙物流園，總資產10億銀，每年貢獻盈利1億，難怪不斷炒高，但5月以來已漲一倍，有貨建議先食一半，其他留低放紙鳶。同具橫琴概念的珠海控股（908）亦可小注追落後。
殼股日東科技（365）近日走勢異動，上周五突破旗形飆22%，收0.395元創兩年新高。主席畢天富於7月3及5日，於場內掃入583萬股，為近兩年來首次增持，管理層靜極思動，料有大搞作。
再睇業務，日東主攻貼片機、半導體等電子產品，架構簡單，每年賺約幾百至千萬元，無甚可觀，加上持有2億元現金，相當於公司市值，可謂靚殼一隻。若回番落36仙不妨雞仔注冷敲，以3億元市值做目標，可見57仙。
魏力
http://www.facebook.com/2012jason