最近上畫的電影《盲探》，可說是《孤男寡女》與《神探》兩套杜琪峯、韋家輝作品的混合體；片中劉德華飾演的盲眼神探說自己查案靠想像力，代入疑犯瞎猜一通。現在我又扮吓盲探，胡亂瞎猜一番！
首先是朗尼應該今周宣佈轉會喇！好地地，點會喺泰國首課操練即傷？這類熱身賽操練強度應該非常低，所以唔使盲探咁醒，大把人都估朗尼扮傷啦。由我瞎猜，應是買家出價一直未達標，曼聯為擺出「唔到價我唔賣㗎」的姿態，夾硬要朗尼上機；到買家驚訝：「真係帶咗佢去亞洲？容乜易踢傷佢？」終於屈服提價，使朗尼幾乎要「原機遣返」；以上瞎猜是否屬實，或於下周揭曉。
日前富咸易主，不知大家是否記得，上任老闆阿法耶茲的仔仔多迪，就是當年與英皇妃戴安娜相戀，並在97年與戴安娜一同死於車禍之人。當年阿法耶茲收購富咸，有說是他遷怒其子的死因是被英國狗仔隊追捕，故此要打造一支球隊，擊敗當時英國人最愛的曼聯來報復！其實若對英國有仇，又怎會掌控一支球隊達15年之久？更成功將富咸由低組別打造成英超中堅分子，入埋歐霸盃決賽。由我瞎猜，阿法耶茲其實應該對英國充滿感情就真！
富咸新班主美國籍的卡漢，想憑旗下美式足球隊積遜威爾美洲虎，在英國宣傳美式足球。據聞今年10月美洲虎更會有1場「主場」比賽在倫敦上演。不過體育在英國是傳統和文化，團隊球賽他們只懂足球、欖球及板球，要搞起球例複雜到癲嘅美式足球，我就估難啲喇！
方柏翹
now足球評述員