（樂）持有英超富咸達16年、84歲嘅埃及富商阿法耶茲，對足球已經冇晒癮，賣盤過程都好順利；上周五富咸官方宣佈，美國籍巴基斯坦裔商人卡漢（Shahid Khan），已經全部購入富咸股份，成為新任班主，亦係英超第6位美國班主，官方冇透露收購價，英國傳媒就估計1.5億鎊（17億港元）至2億鎊（23億港元）之間。
卡漢來頭都唔細，佢靠出售汽車零件起家，據報身家有16.5億鎊（約190億港元），美國富豪榜排179位，本身亦擁有NFL球隊Jacksonville Jaguars㖭。雖然身家大把，卡漢接受英國傳媒訪問時都好親民，有問必答，英國記者捧到佢係一個好親民嘅美國班主㖭。卡漢除咗足球，都好鍾意美式足球同木球，佢講希望安排溫布萊打番場美式足球比賽之餘，仲話想收購英國木球會㗎。