𠵱家啲波衫寧舍搶眼，特別係作客波衫，冇咩傳統包袱，更加可以玩盡啲。上季巴塞作客玩橙色，而新一季阿仙奴同祖雲達斯，都玩黃衫襯藍褲，兩隊波衫顏色設計相似外，仲俾心清水嘅網民惡搞，講佢哋同動畫《壞蛋掌門人》（圖）好似，或者設計師真係想吸引小球迷，先幫阿仙奴同祖記設計呢套作客衫。