俄羅斯索女網球手舒拉寶娃，日前幫贊助商保時捷拍廣告，香車配美人，真係正到冇得彈。佢之後仲出席咗「波子」活動，一條黑色連身裙露出煞食美腿，成為全場焦點。不過大家唔好以為佢掛住搵銀唔練波，因為舒娃近日都努力療傷，為美網做緊準備㗎！
舒娃係德國跑車廠保時捷第一個，亦係唯一一個宣傳大使。佢日前就幫贊助商喺加州曼克頓海灘，同架紅色開蓬911影相；舒娃着住條藍色短褲大晒長腿，坐喺架車上面健康得嚟又性感，真係襯到絕一絕。保時捷仲安排咗一架古董波子同靚女合照，「一老一嫩」都好襯！
夜晚舒娃仲去咗比華利山，出席波子旗下服裝品牌舉行嘅晚會；話晒係人哋唯一宣傳大使，俄國國寶梗係要執到正一正。舒娃特登set好個頭，鬈髮加馬尾，畀人一種新鮮感，配埋一條黑色連身裙，高貴大方得嚟又可以show到美腿，一出現就成為全場焦點。Porsche Design嘅CEO加士拿，仲不停向舒娃sell場上展示嘅產品，好似想叫後者做埋佢哋嘅代言人咁。
日內公佈新教練
雖然場外生活忙到七彩，不過舒娃都冇唔記得自己網球手嘅身份。佢近日最大動作就係同合作咗近3年嘅教練賀斯迪特「分手」，後者因為個人理由，未來大部份日子都唔可以同舒娃四圍去比賽；而喺溫網次圈出局嘅舒娃都覺得，係時候改變一吓，所以決定同教練分道揚鑣。舒娃官網聲明仲話，呢幾日就會宣佈新教練人選㖭。
上周五舒娃仲喺twitter，上載咗一張喺泳池做緊臀部同肩膊復健嘅相，仲話好好玩。如果療程順利，舒娃最快就會喺今個月22號，出席史丹福網賽，為8月尾舉行嘅美網熱身。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第一集足本放送中！速上：
http://hk.apple.nextmedia.com/livestream/channel/talk24