80年代的香港樂壇令人懷念，當年寶麗金三小花湯寶如（湯記）、黎瑞恩及劉小慧，一首一首的情歌，陪伴不少人成長，三小花現已為人母，其中兩位已甚少開金口，只有湯寶如永不言休，但她卻自言其成名飲歌《相思風雨中》，唱了這麼多年，確實令她唱到怕！
撰文：李珮洳
湯寶如去年紀念入行20周年，首次於紅館舉行個唱，多首經典歌曲令人回味，再一次引證80年代的樂壇是最好的。下月湯記聯同一眾寶麗金歌手如關淑怡、陳慧嫻及李克勤等人在會展舉行「寶麗金Forever Live演唱會」，想懷緬一番的歌迷絕對不能錯過。很多人都以為湯記退出了樂壇，其實她一直都有登台唱歌，唱得最多、唱到連她自己都怕的是成名作《相思風雨中》，她笑言：「我真係唔知唱咗幾多次，總之登台就必定要唱，雖然會唱到驚，我都好感恩人生中遇到呢首歌，唔係大家都唔識得我。」
「走音都做歌手」
對於現在的樂壇，湯記這位前輩亦慨嘆不已，打算再出碟的她，深深明白不再是當年賣幾萬張的日子，唱片再不能賺錢，她說：「網上非法下載太勁啦，咁多年以嚟拉過幾多個人呀？真係冇辦法，我好支持將啲歌逐隻放上網賣，如果幾蚊一首歌，啲人都仲要download一啲冇quality嘅版本，咁咪由佢囉。講真歌手𠵱家要賺錢，一定唔會靠賣碟。」樂迷有責任之餘，歌手亦然，正如湯記所說：「走晒音都可以係歌手？我當然唔會開名啦，不過有時睇《勁歌》，有啲歌手好似唔知自己做緊乜。有時我出去做嘢，都唔知邊個係助手、邊個係歌手，有啲歌手打扮太隨便。我知道係公司budget問題未必有咁多資金去買衫，髮型化妝都要錢。」湯記指當年就算去電台做訪問，所有歌手的打扮都一絲不苟。
湯記透露以前的歌手很多都沒有management，歌手簽約時穩袋「一嚿錢」，所有騷的酬勞歌手都袋袋平安，不用抽佣給公司，她說：「以前真係幾好搵㗎，聖誕呢啲大節日真係好開心㗎。不過我哋出去做嘢，好多時化妝整頭都係自己嚟，除非係好大型嘅function啦。」
秘密產子拒結婚
回味完以往點滴，湯記化身為慈母談談與兒子的生活。07年湯記秘密懷孕，ＢＢ的父親是賽車手，至今二人仍未結婚，亦沒有這個打算，她表示：「我哋真係覺得𠵱家嘅生活同結咗婚冇分別，都係簽張紙啫，唔好彩要搞離婚咪仲麻煩，總之個仔出世紙係我哋兩個名就得啦。」湯記透露與男友連結婚相都沒有影，她揚言自己絕不是一個稱職的太太及母親，幸好家中大小事都由男友一手包辦，她說：「個仔一日三餐都係佢搞掂，我開騷前要減肥嘅營養餐都係佢搞。男友好enjoy，中午出去買餸，反而我就冇呢個本事。」
湯寶如笑言未生ＢＢ前，融入不了黎瑞恩及劉小慧的話題，因為二人已為人母，見面時的話題離不開哪隻奶粉比較好、哪間幼稚園師資比較優良。提到兩位好朋友，湯記想起多年前拍攝《鼓舞飛揚》ＭＶ的片段：「嗰日去到元朗拍，當然導演拍晒黎明、張學友先啦，我哋幾個小花就喺度等，幾個人冇嘢做咪打牌囉，到導演叫埋位咪出去拍幾個鏡頭，拍完又繼續打，以前做嘢真係好開心。」
場地提供：九龍海逸君綽酒店
化妝：江中平
髮型：Echo Wan (Headquarters)
服裝提供：D mop, Lab Concept
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！