【灣仔謝斐道】早前苟芸慧（苟姑娘）被指介入47歲郭富城同32歲熊黛林嘅戀情，搞到佢哋分手收場，雖然當事人苟姑娘否認其事，但近日苟姑娘對打邊爐情有獨鍾，唔知係咪受緋聞男友郭富城影響呢？
大前日30歲生日嘅苟姑娘跟伍詠薇（伍姑娘）同簡慕華食飯慶祝，佢哋自從合作完無綫劇《金枝慾孽貳》後就成為好友。前晚佢哋三個約咗喺灣仔謝斐道嘅謙記火鍋食飯，仲要係城城至愛嘅打邊爐，約晚上7點幾，苟姑娘等人先後到達。
約伍姑娘簡慕華
簡慕華同伍姑娘年紀雖然比苟姑娘大，但佢哋嘅打扮反而較青春同有朝氣，反而啱啱先係三字頭嘅苟芸慧一身黑衫，望落比較成熟。
佢哋揀咗最角落嘅卡位坐，打足兩個幾鐘至心滿意足離開，佢哋喺門口擁抱道別後，伍姑娘自己開車走人，苟姑娘就跟簡慕華車返屋企。城城出晒名鍾意打邊爐，經常一晚走兩場，而苟姑娘前晚幫襯嘅謙記亦係城城成日去嘅打邊爐飯堂之一。
採訪、攝影：陳辰、徐錦池、楊浩賢
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！