馬季已經完畢，唞暑之後，九月初，一眾馬迷又再搏殺過。今季馬季嘅投注十分暢旺，有九百幾億元，恢復九七前高峯，馬會自然最高興啦。賽馬投注既與經濟走勢與失業率有關，亦與外圍集團鬥智有關，馬會之最大敵人就是境外賭網與境外外圍馬集團，要贏外圍馬，就要降低博彩稅，呢樣嘢，希望梁振英政府明白啦。其實政府內不少高官常秘、局長、司長，都是馬會遴選會員（Voting Member），佢地應該明白嘅啫，即使管賽馬嘅民政事務局長曾德成不知賽馬為何物，佢隨時可向政府內嘅VM請教嘅，最弊啲政府VM一方面享受馬會之VM權益，一講到賽馬關係，又識得引用conflict（利益衝突）作為護身牌，若果次次係咁，佢地做乜要做馬會會員。
資深馬迷馬主H今季運滯，佢隻馬有中上質素，除咗初出兩場之外，好多次出賽都攞到獎金，但冇法子贏頭馬，每每輸一條鬚一個頸位，今季初出又跑第二，隨後拉親腳筋，唯有放草休息近六個月，原定在六月復出，點知復操之下，又再拉親，舊患復發，馬會獸醫建議退役。老大不願之下，馬主H唯有將隻馬退役，但遞紙之前，翻查file，發覺隻馬有Loss of use保險，當初因為呢項保險嘅費用高額，達馬匹身價一成咁滯，好多馬主都唔買嘅，馬主H見隻馬有啲鬥心，去年特別買埋Loss of use保險，點知今年六月知道隻馬真係失去競賽能力要退役，於是照足手續，首先通知保險代理「多福」，跟指示辦事。最初以為會受留難，俾保險公司問這樣問那樣，原來「多福」（Storfield）嘅董事Tony Lau與Victoria Lau父女十分專業，一個月之內就代為辦理妥當，保險公司AXA賠償十足，馬主H想唔到申領（claim）保險可以咁快捷妥當，為之喜出望外，多謝劉漢鈞、劉穎琪父女幫忙之餘，又為隻馬傷感，卒之聽咗馬主N意見，將隻馬運返澳洲牧場退休。做馬主就是這樣的，個個夢想買到隻「靚蝦王」或「雄心威龍」，但其實名下隻馬如果能夠經常攞獎金，已經係好開心，偏偏馬主H搵到一隻咁嘅馬，隻馬卻要在4歲退休，可惜到極。