呢幾日真係開心死曼谷嘅球迷，除咗曼聯之外，車路士都喺上周五到埗，備戰周三對泰國明星隊。喺過去兩日，領隊摩連奴明顯係主角，先跪拜泰王，再風騷遊湄南河，之後出席記者會嗰陣差啲仆親，但佢心情大好，狂讚自己！
同日前嘅曼聯一樣，車路士上周五到曼谷後，第一件事就係去泰王蒲眉蓬入住嘅醫院。摩連奴帶埋林柏特同泰利兩位老大哥入去，佢哋入鄉隨俗，直情跪埋喺地度，禮數仲做得足過曼聯！之後，佢哋就坐船仔，遊覽曼谷嘅母親河湄南河。喺短片中所見，摩帥開懷大笑，果然係happy one！
白髮越多 代表越勁
遊完河後，林柏特同泰利可以休息陣，但摩帥仲要趕下場，參加記者會。落完機之後嘅活動都冇停過，可能摩帥都有少少腳軟，行樓梯上台嗰陣失平衡，差啲仆落地！好在摩帥身手敏捷，喺跌落地前攞番個平衡，有驚無險！雖然發生咗件瘀事，但完全冇影響到佢嘅心情。有記者叫摩帥比較04年嘅佢同𠵱家有咩分別，佢好型咁話：「𠵱家勁啲囉！我呢份工係好講求年資同經驗。之前離開車路士後，我去過歐洲好多地方，教過國際米蘭兩年，喺西班牙就3年，了解到更多嘅足球文化，比以前嘅我更有經驗。我認為頭上嘅白頭髮越多，就代表我越勁！」
30幾度晨操晚練
摩帥繼續強調自己好開心，「喺首場輸波嚟到前，我一直都會非常高興！」另外，摩帥大讚新兵舒賀爾尼、雲堅基爾同舒華沙，但佢亦𠱁番正選門將施治，話後者係世界最佳龍門。
上周五做咗一日公關嘢後，上周六摩佬就專心指揮球隊操練。車路士絕對冇偷懶，喺30幾度高溫下，朝早先操一課，等班球員食晏後，下晝再嚟多課！喺下晝嘅訓練，車路士仲邀請咗一班讀緊國際學校嘅小朋友嚟睇波！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第一集足本放送中！速上：
http://hk.apple.nextmedia.com/livestream/channel/talk24