Ａ：平哥，晨操隻隻馬都差唔多樣點分別佢哋？
平：人有身份證，就算同名字都唔會有相同號碼，馬亦一樣，每隻馬都有一個烙號，以不同英文字母為首，並以不同顏色布代表是那一季進口馬，如前季N1號係白布紅字「按得美麗」，上季P1係綠布「公証揚聖 」，就係方便我哋睇馬，新季就會輪到S布，是黃底黑字（圖一）。
Ａ：唔同顏色號布分別到啲馬，咁點樣睇一匹馬弗唔弗？
平：睇馬同睇人差不多，眼神最重要，雙眼周圍望鬼鬼崇崇唔集中精神競跑，所以有不同眼罩幫隻馬。其實唔單止眼，其他耳、口、鼻都有不同配備。今日第一堂先講吓眼罩。
Ａ：咁點解有啲馬加眼罩仲跑差咗？
平：加眼罩出賽嘅馬確比平時更落力，但若然是狀態未足，身都未收，胡亂加眼罩跑，頂唔住跑完返來可能受傷，有些馬戴眼罩跑好緊張，一出閘就留唔住，不肯展步亦有。所以有啲練馬師會逐步來，好早已畀隻馬戴眼罩操，慢慢適應。不過，眼罩有時戴得太久，除了反而有新鮮感，老馬或實力見盡之輩，最適宜加眼罩一試，反正都見盡，隨時有好效果。
眼罩Function
眼罩（B）：
馬匹眼睛睇嘢角度好闊，除看到前面外，後面亦看到不少，眼罩就是阻擋後面視線，能集中精神，勇往直前。戴眼罩睇唔到後面，但耳朵聽到後有追兵，有鬥心嘅馬就會越走越快，眼罩有激勵作用。
開縫眼罩（V）：
在蓋上面開一道縫（箭咀），大概手指闊度，這樣馬兒可以看到側面的東西，但看不到後面，開縫眼罩與普通眼罩分別不會太大，反而有一道縫馬匹望到東西，有時會受外來環境影響。
單邊眼罩（O）：
顧名思義眼罩只得一邊有蓋，用來糾正內閃或外閃馬，香港跑順時針，外閃馬用左邊眼罩，內閃則用右邊，當馬匹的一邊眼睛被遮掩，便不會向被阻視線的方向斜跑。
防沙眼罩（P）：
眼罩兩邊都有一個像魚網嘅蓋，可以擋住打過來嘅沙泥，特別適用於跑泥地嘅馬。馬嘅眼睛大，被沙泥擊中的機會就更高，所以有必要戴防沙眼罩。亦有一種半掩防沙眼罩，前半部冇封口，緊張馬易適應，但沙粒容易掉進眼罩內弄損馬眼，有利有弊。
馬圈術語
梅花點：
香蕉有梅花點即係熟透最好味，灰馬亦一樣，有梅花點就係狀態最弗時，黑白分明好易睇，圖為上季「大寶藏」贏馬前晨課操練馬身現梅花點。其他毛色馬，如棗及棕色等，狀態弗時在陽光下是反光的。
腳包：
沙包、叉燒包大家就聽得多，腳包當然係同腳有關，馬匹體重千多磅，只由四隻腳支撐，馬腳纖瘦易受傷，所以腳患係馬匹通病，用腳包除有保護作用，更防止馬腳因負重容易扭傷。
白膠汗：
馬匹身體大部分是脂肪，天氣熱或晨課後最易出汗，出汗水是正常，但起白膠甚至起泡，代表馬匹身肥未夠狀態，等同一個肥仔喺街行一陣都成身汗，要勤操減肥。
疴爛屎
：好多時見到馬匹喺沙圈疴屎，甚至黏腳，唔係腸胃有問題，喺行圈時先天性緊張細膽。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange