成功演唱會必須集合大班專業人士腦袋的構思，曾任王菲及陳寶珠演唱會監製的王麗珍（Ida）表示演唱會想帶出Eason's Life，故陳奕迅（Eason）以T恤長褲出場，Ida說：「用意係希望大家注意到Eason同大家一樣都係普通人，然後先慢慢換其他歌衫。」個唱分Life、Illusion、Feeling和Enjoy四大主題，帶出人生中不同感受，啟發大家對人生的思考，正如第二部份Illusion，歌曲由《Welcome to the future》開始，寓意人來到世界開始生命，之後的歌曲《隨意門》、《時代巨輪》，代表開始成長時大家會隨自己興趣任意闖蕩，直至獻唱《大人》及《碌卡》時，感受到成年人面對社會及生活上的壓力。
鑽石舞台史上最強
演唱會舞台以鑽石形擺位，舞台面積闊78呎、深32呎，而整個舞台能升至22呎高，演唱會監製Ida表示以鑽石形場地舞台來說，今次是有史以來最大的舞台，他們寧願犧牲兩旁更多座位轉成舞台一部份：「舞台上有好多裝置寓意人生，好似台上兩旁三間貨櫃屋，有啲人睇世界會好黑暗，感覺似全黑嘅屋，擁有正面思想嘅人就似白屋一樣清晰，生命中多彩多姿生活嘅人就如七彩屋一樣繽紛。」
巨型舞台在演唱會尾段分段升起降落，如巨型冰粒舞台，先在內地廠房搭建一比一舞台作試驗取得數據，Ida說：「每個細節都要準確，尤其舞台外冰粒裝飾，升降時絕對唔能夠有碰撞，單單舞台升降機器已花費過百萬開騷前一刻都未完全整好裝飾部份，而冰粒上LED燈就長達2,000米。」
巨人舞動機關重重
Eason於Illusion環節唱《大人》時，舞台出現3米高巨人公仔，他跟着旋律靈活舞動，Ida說：「好多人覺得係踩高蹺，其實舞蹈員個頭啱啱喺巨人腰間，當佢擰頭巨人頭會跟住佢擰。」Ida指巨人重約50磅，舞蹈員堅持跟足舞步及研究怎樣操控令動作更靈活自然，連上落樓梯都掌握自如。
舞蹈員服裝有7個不同造型穿梭舞台，Ida說：「代表7個唔同人嘅性格，大口公仔代表愛講是非；長毛怪代表性格深不可測，睇唔到臉嘅兔仔人代表性格模糊嘅人；算盤人指有啲人愛計算計較；標靶人指凡事以目標為本；身上好多玩具嘅愛遊戲人間，花花舞衣代表眼中永遠望到美好世界，大家可搵到自己性格。」
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！