【中環荷李活道】當年《金枝慾孽》嘅玉瑩小主、現年41歲嘅黎姿，𠵱家已經嫁咗畀富商馬廷強做少奶奶，而且仲幫老公生咗三個囡囡，但前晚見到佢同老公食飯，塊面尖尖瘦瘦，身形仲回復少女體態，絕對可以做佢細佬間美容公司嘅生招牌。
前晚大概8點鐘，黎姿兩公婆同一位戴帽嘅男性朋友，坐住架七人車去到中環荷李活道一間日本料理店準備開餐。雖然已離開娛樂圈一段日子，不過黎姿依然好眼利，未落車已經發現記者，所以一落車佢連老公都唔等，黑口黑面一支箭咁入咗餐廳，剩低老公慢慢行。佢哋一行三人食到11點先走，離開嘅時候黎姿依然抗拒鏡頭，佢先叫架七人車開到門口，先等老公上咗車坐定定，佢先低住頭極速衝上車，其實佢保持得咁好怕乜上鏡！
袁詠儀家庭樂
另外，嗰晚張智霖同袁詠儀兩公婆帶埋囝囝張慕童一家三口都喺嗰度開餐，袁詠儀先車住囝囝大概9點幾鐘到達，架車就咁泊正喺門口，之後老公張智霖嚟到會合。其間有警員行過，因為佢亂泊車，所以發咗一張告票畀袁詠儀架車。當佢哋10點半食完飯離開時，仲未知道俾人抄牌，要記者叫住袁詠儀先識落車攞番張告票。
採訪、攝影：羅德光、徐錦池
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange