現年21歲嘅𡃁模梁晶晶（Bonnie）因同柯震東傳緋聞，令人氣上升，但亦因太多嘴，疑惹柯震東不滿，喺微博暗寸Bonnie博宣傳。噚日有讀者爆料，話Bonnie原名梁淑文，中學時喺一名四眼妹，個樣好純品。相中嘅Bonnie係單眼皮、圓頭鼻，仲有方形腮骨，同𠵱家嘅超深雙眼皮、間尺鼻同尖下巴，直頭係兩個人。
馮仁昭噚日打電話打畀Bonnie求證，佢話：「係我12、3歲時影嘅。」但個樣好老積？佢話：「我細個個樣生得大個啲。」係咪整過容？佢例牌否認：「梗係冇，靚咗啫，細個唔識化妝，前幾年仲用雙眼皮膠紙。」驚唔驚靚到阿媽唔認得？佢話﹕「梗係唔會！」佢又話唔抗拒整容，唔怕打針有後遺，希望搵到贊助。之前佢將寫真宣傳片放上網，但有好多踩界鏡頭，被列為18禁。
Jeana柏文繼續同居
另外，一早認整容嘅何佩瑜（Jeana）噚日喺佐敦幫醫學美容公司剪綵，佢話未考慮再整：「我覺得最緊要有character，唔好過火。我𠵱家想漂牙，因為一日飲三杯咖啡，同埋脫毛，比堅尼位嗰度。」Jeana話𠵱家同張柏文係好好朋友關係，仲住埋同一間屋。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange