當Eason於Enjoy環節中獻唱《怕死》時，舞台頂降下一片巨型雲，一名舞蹈員在雲底倒立漫步，原來短短3分多鐘的演出，背後是三位武指及演員每晚被困於半空至少三個半小時。觀眾入場前半小時，武指火星、技術控制師傅阿Lou及特技演員阿顯便登上一架跟貨Van大細相若的浮雲吊船，勾好空全帶後，吊船會升至離地55呎高空靜待演出，阿顯由火星及阿Lou協助下穿上整件威哋網衫及舞蹈服，當阿Lou聽到控制台指示便會略為降低吊船，火星再打開雲底倉門將阿顯倒吊降下，三人要準確掌握時間。
每晚被人倒吊3分幾鐘，現年39歲的阿顯說：「相比起拍戲舒服好多，不過都會有腳痹感覺，返到屋企瞓覺都會暈暈哋，騷前又唔敢食嘢，最多扒幾啖飯。」曾參與Eason演唱會，並於06年「Get a Life演唱會」中也被吊在台頂整晚的武指火星說：「我哋三個人之前都合作過好多次，成個過程最難係放阿顯落去嗰吓，要令佢盡量保持到個動作自然。」至於吊船上的設備，火星表示除了一切安全設施外，就是各人自備私家壼作小便之用，但4場騷都未曾用過。負責控制威哋移動的阿Lou笑指最緊要不要肚痛，講到控制技巧，他說：「吊船上面會有個電視畀我哋睇住船底環境，控制台又不停同我聯絡，阿顯又會睇住台上演員舞步去配合演出。」
演唱會監製Ida指倒吊的舞蹈員可以視作死神，又可當作復活後的天使，正如凡事都可以作兩面看，服飾材料是特別以潛水料製造，務求在倒吊情況下仍能堅挺及活動。
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！