每年升中派位新聞，令我心驚肉跳，嗯，過得兩年，我會不會像這些家長，樂極忘形抱住孩子擁吻，哭笑難分？抑或，索性對鏡頭說，好過中六合彩。可是我根本唔買六合彩，點會中？升中之後，升大學又中一次，人生哪有這麼筍，十年內中兩次六合彩，風水佬都唔敢包啊。
今年更有非常阿媽狂性大發，女兒拿了好成績還在校內動粗襲擊校長。虎媽是怎樣煉成的，我不知道，但煉成後的副作用有人辦睇。阿女做了狀元又怎樣，阿媽發了癲，一樣累人累己，遲早家暴。升中新聞同一天，法庭新聞就有這種典型。25歲科大助教，以公開女友裸照要脅對方性交，被裁判官判囚四個月。旁聽的阿媽登時暈低，醒後呼天搶地，親友制止不果，法庭只能召救護車將其五花大綁送院。阿媽發神經大鬧法庭，港產片裏吳君如或者朱咪咪的角色，竟然有真人版。有媽的孩子，像個……唔，我愈來愈不肯定，最好是寶，最慘是煲，壓力煲。最常見是鋪，阿媽渴望上流，盲操子女博一鋪，結果一鋪清袋。