最近香港運動員威爆澳洲，唔止傅家俊，仲有另一icon李慧詩（Sarah、圖）；佢噚日喺阿德萊德舉行嘅2013超級場地單車盃（2013 Super-Drome Trophy），連贏爭先賽同凱林賽金牌。呢個比賽同之前嘅UCI國際一級場地單車賽，都係喺同一個場館上演，26歲嘅Sarah上晝喺爭先賽決賽擊敗29歲東道主車手摩頓，晚上喺凱林賽又贏埋。佢由星期三開始喺阿德萊德比賽，至今已掃走4金，由「牛下女車神」變身「掃金王后」，真係犀利。值得一提嘅係澳洲殿堂級車手美亞絲噚日缺陣，反而走咗去書店宣傳佢本自傳《The Anna Meares Story》，今日嘅500米計時賽，佢同Sarah就會再碰頭。