葡萄牙喺今屆世青盃16強就出局，不過陣中有位球員嘅表現依然好搶鏡，佢就係有「黑C朗」之稱嘅18歲翼鋒布馬。布馬喺世青盃有表現，據講車路士都有興趣出手收購，而佢本人亦有離隊打算，喺周二向球會提出轉會申請；走唔走得成未知，但一班士砵亭球迷就非常不滿，仲揚言話要綁架佢咁話。
布馬同基斯坦奴朗拿度（C朗）雖然喺外形上非常唔似，但踢法上就有啲相似，一樣係扭得兼有相當唔錯嘅入球能力；而佢兩個亦同樣喺葡超球會士砵亭成名，布馬喺今年2月首次代表士砵亭一隊上陣，之後場波就入佢嘅第一球。布馬喺3場世青盃分組賽入咗5球，依然有機會問鼎今屆賽事嘅神射手。
摩連奴喺今夏離開皇家馬德里重返車路士執教，唔知係咪冇咗C朗硬係覺得爭咁啲嘢，所以打算羅致「黑C朗」，而布馬亦都希望可以投身豪門，據講已經喺星期二向士砵亭提出轉會要求，而士砵亭球迷知道之後，竟然密謀要綁架佢。
呢單嘢係布馬嘅經理人爆出嚟，雖然佢冇詳細透露到有幾多球迷參與，點樣接近布馬同埋成唔成功，但確定嘅係已經報咗警，布馬𠵱家亦都好安全：「呢次係一件非常嚴重同埋令人唔開心嘅事件，我必須要交畀司法機關去處理。」布馬人冇事，但走唔走得成就仲未知，因為就算布馬只係同士砵亭剩返一年合約，但士砵亭暫時仲企得好硬，冇打算放佢走。
車路士熱爆曼谷
另外，車路士大軍已經喺噚日飛抵曼谷，準備第一場季前熱身賽。同曼聯一樣，車路士喺當地都受到熱烈歡迎，甚至要動用警察去封路嚟確保佢哋嘅安全。今夏加盟車路士嘅3名新兵舒賀爾尼、雲堅基爾同埋舒華沙都有隨隊，不過費蘭度托利斯同大衛雷斯等幾位之前有份出戰洲際盃嘅球員就缺陣。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange