伊利沙伯中學一位女生參加學校之傳統營火營，不幸燒傷，需要緊急搶救，所有家長聽見呢啲新聞，傷痛之餘，無不告誡子女：「參加學校活動要好小心。」
但中學生十幾歲，跳跳紮：出到郊外紮營，唔通仲要規行矩步，完全聽晒老師吩咐咩，總會有自己一套頑皮嘢玩吓嘅，少年在外不偶爾猖狂，必係書呆子，創意欠奉，長大後容易成為順民。
一位中大小師弟讀書時與同系同學到長沙露營，俾同學拋落水，幾乎浸死，同學以為佢詐諦，不予理會，好彩有一位同學入水打佢：「喂，唔好作狀呀！」見佢唔郁，急忙拖佢上岸，幸好冇事，返到屋企，報告過程，小師弟自然俾父母大罵一頓。騎騎，眨眼間過咗幾年，小師弟在某名貴（又出名又貴）中學教初中生，某次舉行學生活動，佢睇見有啲枱椅無人理會，叫幾個學生幫手搬枱，俾主任見到，立即訓斥一頓：「你以後唔好叫學生搬枱，有乜意外整親佢地點算？有事就叫校工做！」邊度有咁多校工吖，校工又唔係三頭六臂，師弟唔抵得，咪自己郁手搬囉。然後學生上木工堂，師弟記得自己讀中學時，老師教佢用小鐵槌，用釘，刨木，用鋸，但今天之名貴學校學生之木工堂，冇槌冇釘，師弟問主任點解，主任話：「驚住學生打傷，釘傷手指，俾家長控告就大件事，總之安全第一，我地教學生用膠水，唔用釘。」
無槌無釘，何來木工，師弟不是木工科老師，只係覺得可笑。佢與左丁山講起，左丁山對佢講：「你間學校啲家長除咗有錢之外，還有專業知識，當中大把係律師、會計師、醫生，好叻保護子女權益嘅，你嘅主任就有豐富經驗嘞，你唔好咁有為呀，因住被告上教育局甚至法庭！」師弟為之苦笑，佢自己係80後，已被上一代笑為嬌生慣養，依家佢教着一班回歸後先至出生嘅學童，更覺得回歸一代受到太多保護。佢有一次要一位頑皮學生留堂，隨即收到律師（家長）電話：「你根據邊一條校規罰我個仔留堂，有無經過正確程序處理及諮詢家長意見……？」師弟被律師家長問到無言以對，唯有放學生返回家，此種教學法，實不知是好是壞，香港精英下一代不知如何獨立做人，但一定識得推卸責任，爭取個人權益。