三個女人一個墟，聚埋夠晒八卦，換上黎智英（肥佬黎）、倪匡和蔡瀾三位學問、閱歷與口才俱備的智者，無所顧忌，談情講性，東拉西扯，同樣娛樂滿fun。三名嘴難得為蘋果動Live新節目《亂噏24》開咪，昨晚播出的頭炮內與宅男女神周秀娜chit chat，四人亂噏一餐，即使講到同性戀和整容等敏感話題，周秀娜都有問必答。64歲肥佬黎自爆看電影《色，戒》被影帝梁朝偉露股床戲，弄得心跳加速又腳軟，一度懷疑自己性向，周秀娜好奇連環發問，反客為主變主持。蔡瀾更爆料有女星整容搞到歪臉的失敗個案。《亂噏24》每逢周四晚上11時播出。
撰文：比華利
黎：黎智英 倪：倪匡 蔡：蔡瀾 周：周秀娜
全球都在正視同性戀問題。法國於今年5月宣佈同性婚姻合法；而在香港，黃耀明和何韻詩等藝人亦走上街頭爭取同志平權。三名嘴對同性戀都有他們的看法。
蔡：𠵱家女人少嘞。
黎：你講中國？𠵱家女仔比男仔少14%。啲麻甩佬冇老婆嘞。
周：所以𠵱家女仔好珍貴。
黎：唔係嘅，搵第二啲囉（意指男人）。
倪：我有個問題，法國話同性婚姻係點樣一件事？
黎：兩個女人結婚，或者兩個男人結婚。
倪：（疑惑）兩個男人點解要結婚，有得住埋咪得囉！
黎：佢要法律保障。
蔡：總之兩個男人得唔到嘅嘢，唔合法，就要去爭取。
倪：又有樣唔明白啦，呢樣嘢點解要反對，兩個男人結婚關你乜嘢事？
黎：好多人覺得一個家庭係男同女嘅。
周：唔係咁多人都咁開放。（伸手作張開胸狀）
黎：好多父母都接受唔到，同性戀係一個潮流。
倪：天生嘅冇辦法，係DNA問題。
睇《色，戒》心跳加速
說到有同性戀者是天生這話題，肥佬黎自爆曾一度懷疑性取向，那是入戲院看李安的電影《色，戒》。莫非每人心中都有一座斷背山？
黎：一個男人都有可能有同性戀因子。講《色，戒》先，梁朝偉同湯唯嗰個鏡頭嗰幾十秒，個心卜卜跳。
倪：（認真問）點會心卜卜跳？
蔡：你會，佢唔會，我都唔會。
黎：你明知個鏡頭好基佬，心卜卜跳，我睇到又腳軟。
倪：（懷疑）你睇乜嘢睇到腳軟，睇湯唯定梁朝偉？
周：（搶問）所以你會揀梁朝偉？
黎：梁朝偉嗰個角度嚟。
周：嗰個角度好梁朝偉？
黎：完全用男人姿色角度，去拍佢做愛。
倪：我完全冇注意到，我只係注意個女角喎。
黎：我都睇到自己覺得，嘩大佬，我係咪有基佬因子？
周：（好奇）你懷疑自己有同性戀傾向？
倪：（懷疑）睇到男人身體都會衝動呀？
蔡：（大笑）天方夜譚呀。
周：所以導演好犀利，可以拍到令男性覺得你係想對佢有愛。
黎：你自然有反應囉，你覺得有反應喺度，你就會驚囉……
年輕被同志睇中
當然我們都知那只是一刻幻覺，不過肥佬黎後生時亦試過被同性戀者看中。
黎：我以前喺fashion做，成日同啲男仔一齊，有啲基佬到咁上下，真係突然有個姣樣，如果佢真係想媾你，佢就有個騷樣，有個姣樣出嚟。
周：（手舞足蹈）即係點啫？
黎：你係解釋唔到，我𡃁仔嗰時成日有遇，青靚白淨，個個想媾。
周：所以你以前好多基佬埋身？
黎：Fashion嗰啲你稍為做得好嘅designer、嗰啲merchandiser都係基，講真，佢哋對美有嗰種敏感程度。
周：以前黎生你咁青靚白淨，好多同性戀埋身，如果呢個世界就冇女人㗎啦，如果一定要揀一個男仔嘅話，要做嗰啲，同你一齊嘅嘢，你會揀邊個？
黎：我唔會揀囉。根本做唔到。
蔡：（大笑）假設性問題唔答呀嘛！
倪：好好玩㗎基佬，嗲聲嗲氣，幾好玩㗎你唔好話。扭身扭勢，好玩到咩咁，哈哈哈哈。
周：係，佢哋乜都得。
蔡：冇冇冇，我冇反對，但係唔舒服。
倪：我唔反對基佬，我好鍾意基佬，因為基佬大多數都好平和㗎嘛，又有藝術眼光。
切忌彎腰執銀包
眾人討論同性戀話題似乎欲罷不能，說着說着又扯到去電影《監獄風雲》的經典笑位。
倪：我喺三藩巿住咗十幾年，同性戀者見得多，佢哋好親密。佢哋話皮包跌落地唔好彎腰去執。（笑）
黎：唔係，係跌咗嚿梘，唔好烏低去執，如果喺監房。你沖涼呢，跌咗個番梘，千祈唔好烏低去執。烏低去執嘅話，你就起唔番身！
倪：喺三藩巿，你跌咗個銀包都唔好彎腰去執。（又笑）
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！