女星整容話題往往熱爆，日本通蔡瀾更大爆有女星在當地整容失敗，導致下巴變歪。聽到削骨纖臉手術，周秀娜嚇到花容失色。
黎：後生時明星冇得整，𠵱家兩個感覺比較，𠵱家實靚好多，有啲真係整到范冰冰咁，乜冰冰、物冰冰，任你整喎。
倪：你分到邊個范冰冰、李冰冰咩？
黎：我分唔到。
蔡：嗰時我做電影已經有（女星）整容，我嗰陣時喺日本，所有明星嚟日本都係我帶佢哋去（整容）。
黎：整邊個地方？
蔡：整眼同鼻最多，胸又有，下巴又有，有個整咗失敗咗，歪咗，打畀我喊苦喊忽，原來歪咗，咪幫佢按摩囉（蔡瀾邊說邊做按摩動作），又好咗喎，但一放手又塌番。
周：（呆一呆）咁兒戲嘅！
蔡：結果再帶佢去睇醫生，又抽出嚟，又打入去，結果返嚟香港都歪歪哋，好好玩，嗰陣時好原始，𠵱家越來越犀利。
倪：𠵱家韓國整容術好好嘛。
蔡：𠵱家係成條街，有間醫院好大間，連埋酒店，好多大陸女仔咪去到嗰度唔使住酒店。
黎：變成一種競賽，我睇到一啲整容，話打大啲呢度，打高呢度冇所謂，有啲拆咗啲骨去真係匪夷所思，我嗰日睇雜誌，兩大箱呢啲骨，真係嚇到我。
蔡：我有個朋友喺新加坡係fashion guru（專家），佢成日同韓國女人削呢個地方（摸一摸腮骨），佢講用電鋸。係一個好嘥錢嘅手術，我𠵱家有啲朋友呢度（臉頰）都闊啦，但忽然間影相又冇咗，大家就傳佢去削⻣，其實都唔係，係影相角度，呢個係大手術嚟，係好貴手術。
周：同埋好痛好痛。
倪：麻醉藥一過咗就痛，削骨係皮肉，神經完全裂開咗。
黎：我喺前面鑲牙，十幾廿年前都痛到飛起，淨係喺骨度鑽兩個窿，你唔好話成嚿骨將佢鏟起，做明星真係好大犧牲。成箱成箱骨，一定好多人做㗎。
倪：𠵱家個個靚女都差唔多同樣款，完全都係做出嚟㗎啦，完全分唔到邊個打邊個……𠵱家你網上有得睇，高中畢業相同韓國明星相，分唔出兩個人。有個笑話，有人娶咗個靚女，生咗個女出嚟醜樣到死。後來個個睇到似媽咪，原來媽咪細個相係咁。
周秀娜髮型：Daniel Cheng of Chin.G
化妝：Yan Chiu of D-Mop Beauty
服裝：Dragonhead
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！