堆填區擴建打柴，間接令「源頭減廢」四字流行起來，不過就被套用到要求689下台，變成從源頭減掉廢柴之意。其實今日管治亂七八糟，冇規冇矩，係源自一班茂利、廢柴自己友小圈子管治。
呢棚梁營核心出於無知與偏見，心態上蔑視幾十年行政主導體制留下的管治智慧，認為公務員因循保守，欠缺戰略思維，佢哋掛在口邊一句：「點解唔做得？」深信公務員因循，藉口多多，所以不願打破成規。
一味吹水 其實一事無成
幾個特首親信走埋一齊，互相聲援，結果變成一班茂利，左出一拳，右出一腳，美其名成熟一項推出一項，實際上根本沒有套路章法可言，講咗當做咗，做唔到就諉過於人。
以東北發展為例，環保及社運團體因對陳茂波一手滅村，一手放水畀大地產商極之不滿，才提出收回粉嶺高爾夫球場用作起屋，保住東北鄉村農民。
陳茂波為求抽水，竟然走去搭嘴，話可以研究收回，心態上當然係：「點解唔得？」但呢頭講完就已經中招，因為高爾夫球場用地乃民政局管轄，同陳茂波無關，結果當然係虎頭蛇尾。
特區政府目前已陷入特首自己友統治Chumocracy，原先此用字是批評英國首相卡梅倫親信自己友，多來自伊頓公學小圈子，great chum係肥彭在港左右手細龜黎偉略Edward Llewellyn，當日督府內之四眼龜今日權傾英國朝野，是卡梅倫首席幕僚，另一位Jo Johnson，又係伊頓同學，出掌policy unit。
呢棚人同聲同氣，為卡梅倫出謀獻策。而卡梅倫伊頓班自己友還好，至少是年輕兼專業的政客，香港式Chumocracy，比𡃁模還要業餘。
由八十年代北京栽培之政客，唔需要有實戰經驗，口噏噏當秘笈，齋吹唔使真做，一旦掌權，早已學壞師，以為開口中隨口噏就等如管治施政，加上多年來被港英忽視、排擠，今日大翻身，難以用平常心去看待舊制度之好處。茂利們一味吹水走民粹，到一事無成，就諉過於政務官因循，財務科保守，梁粉何喜華七一前在《明報》專訪中對財爺開火，便完全暴露出呢種心態。
香港政治體制落後，執政力量鬆散，政治人才匱乏，官僚保守主義自有其存在原因，梁粉政府急於求功，但欠政治力量，若再加上友好小圈子，將不斷製造內部矛盾，呢個現象早在十年前老董第二任出現過，香港究竟受咗乜嘢詛咒，十年後又再重複一次。
添馬男