噚日仲有隻智美控股（1661）首日掛牌，撞正風頭躉港大零售（1255）同日上巿，冇俾人搶晒風頭，有乜撒手鐧？咪就係38歲嘅靚主席任文囉。
快四字頭 保養得宜
上市公司靚女主席當中，大概只有做過藝人嘅修身堂（8200）主席張玉珊比較省鏡。智美任主席都唔輸蝕，雖然就快四字頭，但係佢眼大大，鼻高高，都可以加入靚女主席之列。
公司噚日掛牌，佢為咗隆重其事，專登花過萬元走去置裝，度身訂造白色旗袍，仲同師傅講，件旗袍有中國特色之餘，仲要有新潮元素。造衫之外，佢心口戴嗰嚿彌勒佛，都係為上巿而買，任主席話貪佢笑瞇瞇咁樣，寓意笑口常開。
不過股東就未必笑得出嘞，隻股噚日收報2.07元，潛水近2%，大市狂升佢都唔升。