【銅鑼灣】徐子珊、黃子華、阮兆祥、陳敏之同林子善等前日喺銅鑼灣崇光百貨附近嘅行人專用區拍無綫劇《My盛Lady》，今次係拍一場求婚激咀重頭戲，所以下晝5點已經有工作人員開始佈置，仲出動咗吊臂機，現場仲安排咗50名臨時演員㖭。
子珊哭成淚人
到夜晚約8點鐘一切準備就緒，演員開始埋位時吸引咗200名巿民圍觀。劇情講陳敏之同徐子珊行完街經過行人專用區，敏之大叫咗一聲「開餐嘞」，之後見到班演員攞住刀叉出嚟載歌載舞，其中扮成牛扒嘅黃子華就慢慢行出嚟瞓喺街畀班臨時演員踐踏，其間一名女臨記因為叉錯腳，仆損成個膝頭。
就喺子華俾人踩之際，子珊坐埋一邊培養感情，唔使5分鐘已經喊到成個淚人。到之後再拍就講子珊扶起趴街嘅子華，子華就趁機攞出戒指求婚，最後有情人終成眷屬，佢哋更應要求當街激咀10秒，整個拍攝一take過搞掂。不過因為太多途人，加上天氣太熱，唔少演員大汗淋漓，仲因為太辛苦而有啲黑面。
採訪：徐錦池、吳耀輝
攝影：羅德光、黃曉程
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange