噚日收市後喺中環戲院里有班𡃁模玩另類「佔中」，20位着住短褲、背心嘅𡃁模，向途人派宣傳品，叫人投票選出今年最具投資價值嘅上市公司，吸引唔少人要求合照、影相同圍觀，佢哋背脊又有個QR碼，歡迎途人走去嘟。
公關公司宣傳技倆
成件事係財經公關公司宣傳技倆，佢哋搵咗大約50間上市公司，叫人呢個月上網或用手機投票，選出十間八間最具投資價值嘅上市公司，名單包括傳陷財困嘅熔盛重工（1101）。
雖然主辦單位話呢班𡃁模會「展現佔中熱誠」，但佢哋對於爭取普選嘅佔中，似乎冇乜頭緒。問佢哋知唔知佔中係乜、邊位係佔中發起人等問題，佢哋都答唔出，一臉茫然，其中一位靚女仲話「年年7.1都佔中㗎喇！」，認真得啖笑。