脫罩後嘅龍小菌重操故業教番書，噚日喺九龍灣英皇教室補習社，首次上免費試教班，有超過300個學生上堂。原本1小時15分鐘嘅堂，小菌老師賣大包送多15分鐘，不過有學生就話佢好似教緊小學咁，教中四至中六班有啲勉強，街訪嘅五個同學仔當中，有兩個話唔考慮報名，睇嚟會幫襯嘅都係一半一半。
爭影合照簽名
小菌老師對於學生話佢似教小學，佢話：「呢次試堂由中三到中六學生都有，方向較難定，不過都有文言文，如果學生覺得文言文都小學，都冇辦法。」佢好開心有學生慕名而嚟，又希望大家知佢識唱歌，仲識教中文。放咗學就有二、三十個學生圍住小菌老師影合照同簽名，好似開緊小型簽名會咁。對於有學生話唔報讀，佢話：「每個學生有佢選擇，冇理由逼佢揀我。」
有指小菌同吳君如弟弟吳君祥簽咗六年約，佢未完約就飛起舊老闆，噚日經理人邵子風接受電話訪問，被問係咪賠錢走？佢話：「協議唔講，非常和平解約，原因係小菌唱二次創作歌，大家政治立場有分歧。」吳君祥喺截稿前未回覆。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange