電視撈飯:回敬老公咀定欣YoYo露膊勾馬明

電視撈飯:回敬老公咀定欣
YoYo露膊勾馬明

王浩信日前拍無綫新劇《貓屎媽媽》,當街同胡定欣熱吻,王浩信仲得戚話唔使同老婆大人陳自瑤(YoYo)申請或備案,YoYo同樣拍劇遇上親熱鏡頭,都有好大自主權。近日埋首趕古裝劇《寒山潛龍》嘅YoYo,日前就同馬國明(馬明)有場曖昧戲,劇情交代佢哋係一對舊情人,但馬明升官後拋棄女友,失戀YoYo淪為青樓女子,點知佢又捲入一宗案件,馬明為查案到妓寨,佢衝入一個妓女房,偏偏撞正YoYo啱啱除衫露出白滑膊頭。

「不如返去湊仔」

YoYo發現有陌生男人入咗房,正想大叫嘅時候,馬明手急眼快伸手掩住佢個口,YoYo瞪大眼見到係舊愛,當然打個突,馬明未及解釋,咁啱佢正印老婆李詩韻就殺到捉姦,佢哋又衣衫不整,認真水洗唔清。鏡頭以外係人妻兼人母嘅YoYo,話唔介意劇情需要拍親熱戲,佢日前喺電話度話:「劇情有需要,我一定配合,老公呢方面會尊重我決定,我哋互不干涉。我覺得呢樣唔拍,嗰樣又唔得,咁不如返去湊仔啦。」
版主:陳基征

王浩信日前拍無綫新劇《貓屎媽媽》,同胡定欣喺街頭熱吻。資料圖片

YoYo話做演員要投入角色,劇情有需要就要配合。劇照

今次YoYo喺劇入面俾馬明拋棄,仲淪落到做妓女。劇照

逢周五隨《蘋果日報》附送嘅時尚美容雜誌《add》雖然早已派完;
拎唔到書嘅朋友,可以上番《add》嘅官網 http://add.appledaily.com 睇番足本網上版,除咗有專訪外,仲有好多時裝靚嘢睇!