【銅鑼灣→北角】無綫藝員鄭俊弘最近喺節目《星夢傳奇》一唱驚人，表現出色成為得分王，連佢都話：「苦等十年，只求觀眾講得出我個名！」成功出位後唔止有人記得，仲俾人極速起埋底，原來早喺01年攞咗全球華人新秀大賽三料冠軍，又被爆同秦沛寶貝女姜麗文拍拖喎。
人紅工作自然多，前日4點幾，鄭俊弘同女經理人去銅鑼灣開工，工作到6點左右，佢哋就喺銅鑼灣港鐵站分手。身高成6呎嘅鄭俊弘，戴住帽又孭住個袋，雖然叫一唱成名，不過喺港鐵幾乎冇人認得出。
否認戀姜麗文
喺北角落車後，鄭俊弘去咗麵店嘆餃子，埋單盛惠30幾蚊，認真經濟實惠。食完嘢佢去咗行超市，見佢專搵啲特價蔬果嚟買，好慳家。準備畀錢時，終於有位男粉絲大讚佢，仲要求合照，𠱁到鄭俊弘受寵若驚，笑到鬼咁開心！個粉絲搵咗個超市員工幫手影相，位女員工影完都唔執輸，同另一位同事都影埋一份，鄭俊弘被輪影完後，就好開心咁返屋企喇。
另外，鄭俊弘噚日接受商台訪問時否認同姜麗文拍拖，仲話佢哋喺溫哥華已認識，又大讚女方係good girl。對於能否喺《星夢傳奇》留到最尾？佢就話：「當然想留到最尾，都有啲信心，但唔諗咁多，只係想每一集都唱好自己嘅歌！」
採訪、攝影：陳辰
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange