伯老話收水又縮沙，淡友被挾到氣咳，平倉盤帶動下，個市由頭升到尾，成交相當配合。以黃金比率分析，昨日恒指剛好反彈前跌幅的50%，相信短期會有阻力，以0.618倍計，反彈目標先睇21951。
淡友平倉以指數股行先，之後再揀二三線，經過昨日一棍，再追入藍籌意義不大。有何博反彈策略？大方向係揀殘股，即5月以來跌得最多的股份，沽空比率高的可優先吸納。之後，升勢應蔓延至股份質素較弱，但市值不大的股份。同時，科網等強勢股料再次起動。最後當連年虧損、盈警股都炒上，升浪就將近尾聲。
循此方向選股，魏力首選中國無線（2369）。貴價蘋果、三星智能手機市佔率近飽和，取而代之就係主攻新興市場的中低檔機。中國無線旗下酷派手機熱賣，《福布斯》報道，酷派在華市佔率已超越蘋果，5月份升至10.2%，僅落後三星及聯想（992）。管理層指，上半年目標收入增長50%，並可能獲得中移動（941）的4G手機定單，增長潛力一流，上半年盈利料可觀。
集團由5月高位累瀉35%，低見2.54元，估值相當吸引。彭博綜合預測，今年預測PE僅13倍，以反彈跌幅0.618倍計，股價可見3.39元，潛在水位17%。
魏力
http://www.facebook.com/2012jason
本欄逢周一、二、四、五刊出