「超人」李嘉誠亡妻莊月明嘅家庭成員，噚日罕有地齊齊現身交易所展覽廳，為莊氏家族旗下鞋履零售商港大零售（1255）首日掛牌打氣。
港大零售細細粒，上市後，噚日市值只得4.26億元，恒指升逾500點，佢最叻都係喺開市冇耐升過5%左右，收市穩守招股價2.13元，表現相當一般，莊氏家族名氣撐唔撐得住隻股，睇怕要睇長線嘞。不過就算係超人分拆新股上市，都唔係隻隻掂。
噚日焦點都係喺莊家兄弟姊妹身上，難得佢哋一齊公開亮相。二哥莊學海身為港大非執行主席必然在場主持大局，三弟莊學熹同為非執董，亦終於露面。
至於莊家姐妹，舊年有份捐錢畀CY競選特首嘅莊月霓，阿仔曾經同藝人廖碧兒傳過緋聞嘅莊月華都有出現，雖然莊家長子莊學山缺席，但就派莊太做代表。幾位女士似乎對公司股價表現相當感興趣，忍唔住不停企埋股票機睇股價表現。
超人登廣告祝賀
莊氏兩兄弟對傳媒態度友善，只係以非執董為由，將有關公司嘅問題交畀管理層，莊學海都係好行咁話「多謝各界支持」，問到超人有冇恭喜佢，佢就笑笑口答話「記得睇報紙」。
原來超人以長和系內四間上市公司嘅名義，噚日喺三份報章買半版廣告祝賀對方，畀晒面。
李華華
mailto:[email protected]