發展局推出發展新界東北方案，反對派諗出一招移形換影，利用民粹仇富心態，提出佔領粉嶺高爾夫球場，提出將球場改變為興建公屋用途。呢招一出，部份視線轉移，若政府中招要檢討、討論嘅話，必然蹉跎歲月，十年內都發展新界東北不了。
粉嶺高爾夫球會會籍物以罕為貴，左丁山唔係會員，亦唔識打高球，究竟呢個球會位於何方，根本唔識揸車去，但有不少老友係高球發燒友兼係粉嶺高球會會員，每有球局，晨早五點幾就起床出發，緊張過返工。佢地入會之時，會費冇依家咁貴，由百幾萬至四百幾萬元都有，最近之入會費聽講好誇張，已經升到一千五百萬元咁話，有待查證。中文大學以前有一個會員籍，幾十年前買落嘅，後來李國章校長辭職做局長前後，有說中大校長唔應該打高球，將會籍賣咗，作價約四百五十萬元，比今日市價低三倍有餘。
但無論會費幾貴，如果政府受民粹勢力所逼，收回高爾夫球會場地嘅話，今天入會之會員有何財產保障？唔通叫政府賠番，呢樣嘢係一個「投資風險」，高爾夫球會應該發通告向會員解釋，以免構成誤導，意圖入會之會員尤其要問清楚法律意見！
收回高爾夫球會之說，令各大市區會所人人自危，不過個個會嘅批地條款都唔同，不可一概而論，但相信每一個私人會所嘅理事會、董事會都要研究吓呢個「收回問題」，以免後知後覺，令新入會會員損失慘重。前個星期有老友請去覺士道九龍木球會（KCC）吃晚飯，左丁山摸錯隔籬，行入咗KBGC（九龍草地滾球會），呢兩個會在佐敦旺區佔地甚廣，晚上飲酒食飯好地方也，如被收回興建公屋，對面的豪宅業主就要嗌慘咯！不過退休賓架T住在九龍，比較鍾意到附近嘅三軍會，話更加清靜喎。呢個三軍會拆咗起豪宅嘅話，一定搶手到極，不過以前係駐港英軍享用，現在解放軍根本不用，只係做業主，大概特區政府郁佢唔到，但區內衞理道有印度會、菲律賓會等，聲音冇咁大喎，點解冇人話收番起公屋呢？再講落去，沒完沒了，所有香港私人會所（香港會除外）場地，都有被收回可能，梁振英、陳茂波如不迅速消除收回高爾夫球會之民粹論，勢必陷入被動捱打局面。