晉佳6月24日講過，將恒指反彈目標定喺21500，相當於跌浪嘅一半，亦接近250日線，同時係4月低位阻力。然後6月尾、7月頭港股連續幾日反彈後，晉佳7月3日話寧願先套現，然後採取消極態度作戰，只持有破頂強勢股，結果7月至今恒指保持chok上chok落，噚日強勢突破，挑戰21500，已經接近預計嘅反彈目標。由於大市一直循劇本進行，所以呢刻維持中線睇淡，彈得越高，持貨風險只會越大，除非有把握今日買完聽日贏住走，否則現時買貨嚟坐，絕對唔係好主意。
之前錢荒、美國退市消息，搞到個市跌足4,000點，噚日先有伯南克表明繼續維持超寬鬆貨幣政策，退市未有耐，同時市傳四大行7月首7日新增貸款1,700億元人民幣，壞消息一掃而空之下，恒指升532點只算不過不失，而嚟緊好消息出到差唔多，只剩低下周一內地公佈第二季GDP數據，睇吓仲有冇驚喜。由於總理李克強講過為經濟增長設定下限，所以數據或多或少睇到中央對於經濟增長表現嘅容忍程度，若數字令市場失望，下半年都唔使旨意靚仔，隨時成為淡友開刀藉口。
長線寧願買珠船
橫琴概念股除咗晉佳之前推介嘅珠江船務（560）之外，仲有一隻珠海控股投資（908），股價同樣喺5月尾開車，成交轉趨活躍，噚日似有突破。
不過，晉佳橫睇豎睇，珠海控股基本因素其實冇乜好睇。佢持有酒店、客運、港口同埋最廢嘅主題公園業務，舊年收入升14.3%至3.35億元，毛利升21%至9,711萬元，但其他收入大增1.9倍至5,766萬元，先至令純利達到5,951萬元，牌面睇盈利能力認真麻麻。
珠海控股嚟緊用16.5億元收購珠海商住地皮加上高爾夫俱樂部，即係轉型做內房股，但以過往track record睇，轉行更加難畀人信心。單靠橫琴概念支撐，短線追落後、博上1.80至1.90元仲有機會，長線表現相信仍然係珠船好得多。
晉佳
本欄逢周三、周五刊出