【正面影響】
賭場注碼「加價」，分析員與股評人齊齊表示「冇有怕」，並預料提高注碼會帶動整體投注額上升，有助賭場賺多啲！
Union Gaming Research Macau的濠賭股分析師Grant Govertsen指出，由於澳門當局實施「限枱令」以嚴控澳門賭業失序發展，令賭場營運商要諗計「賺多啲」。他又認為，現時賭場營運商提高最低投注額的方法，有利增加賭場的收入及盈利；加上賭場亦有為賭客提供注碼較低的電子賭枱，相信就算傳統賭枱注碼提高，亦有力留住「小賭客」。
間中「過大海」玩兩手的訊匯證券行政總裁沈振盈表示，賭場將「雞仔注」的小賭客趕離傳統賭枱，反有助增加賭場的收入。
中場收入比例大較着數
沈振盈認為，「去得賭場嘅賭仔都係賭性不變，都係會照賭。提高咗最低投注額，由於成個volume（量）大咗，就算計番殺數（即淨贏率）後，賭場盈利相對都會高咗！」
事實上，現時濠賭股中場賭枱的平均殺數高達逾三成，遠較約得3%的貴賓廳為多。沈振盈指出，金沙（1928）及澳博（880）兩間中場較強的濠賭股，最能受惠賭枱「加價」所帶來的正面影響。
AMTD證券業務部總經理鄧聲興同意，中場收入比例大的賭股會受惠，「因為中場淨贏率高，有三成幾，而且唔使分佣畀叠馬仔，而且嚟緊嘅概念係度假村，Focus（集中）喺中產人士，提高最低投資額有助增加中場收入。」新濠（6883）去年的中場收入佔22.43%，僅次於金沙的34.85%及澳博的30.56%，谷大最低投注額後，上述三隻濠賭股會顯著受惠。
