噚日最令唐牛吃驚嘅新聞，唔係唐英年老婆認僭建，亦唔係伯南克彈弓口話唔收水，而係紅衫魚升級至「避免」食用。曾幾何時，紅衫魚係每晚鐵膽餸菜，兒時拉着外婆衫尾逛街市，總聽到「三蚊一條、五蚊兩條」嘅叫喊聲，如今卻因為過份捕撈令供應大減，批發價更去到40幾蚊一斤。
其實呢種情況只係冰山一角，全球污染問題越來越嚴重，唔少魚類瀕臨絕種邊緣，因此點解阿爺雖然唔肯放水救經濟，但依然全力搞好環保工作。大陸錢荒危機下，環保概念股依然越升越有，主打污水處理嘅北控水務（371）噚日搶高3.5%，創金融海嘯以來新高，喺大成交配合下，升勢料有餘未盡。早前摩通報告指集團最近以2.7億人仔收購26間污水處理廠，每日產能高達93.75萬噸，有理由相信業務今年可超標完成，故維持跑贏大市評級，最新目標價睇3.30元，較噚日收市價2.96元，有11%上升空間，食正國策圖表亦配合，現價上車絕對值博。
唐牛