暫時仲係反對擴建屯門堆填區嘅鄉議局主席、經民聯劉皇發，早幾日游說自由黨田北俊一齊反對後，就令人誤會田少向經民聯挖角，以為田少想撬發叔回巢。明人不做暗事嘅田少噚日澄清，實情係發叔游說佢時，佢就話當年發叔仲喺自由黨嘅時候，當然義無反顧撐發叔，但如今發叔都唔係自己人，所以咪反問發叔一句：「你唔通想番自由黨咩？」點知惹嚟誤會啫，無意撬經民聯牆腳。
至於發叔就繼續落力游說人反擴建，噚日佢見到政壇元秋蔣麗芸就捉實人哋話：「你唔好俾政府呃呀！一上就三個一齊上、一落就三個一齊落嘛！」身為梁粉嘅元秋聽完一笑置之，發叔都係慳番啖氣暖肚啦。