要喺低檔次品牌突圍而出，除咗搵代言人之外，玩crossover都係一個唔錯嘅選擇。好似之前Bossini就crossover《反斗奇兵》（Toy Story），搵容祖兒做代言人，當中有個款式仲賣到成千蚊件！
當時，堡獅龍（592）股價都曾經炒高過，但好快就跌番落嚟。𠵱家股價連4毫子都唔到，粉絲們睇怕都冇眼睇。
正所謂「同人唔同命」，佐丹奴（709）股價就硬淨得多，雖然今年因為成個零售市場同內地銷售麻麻，搞到碌咗落嚟，昨收7元，微跌0.14%。不過，DBS星展就出報告唱好，指經過連串推廣及推出《怪獸大學》商品後，銷售已開始改善，毛利率料唔錯，加上今年度中東業務將全數入賬，可彌補港台等成熟市場放緩影響，更預計佐丹奴今明兩個年度，股息率可高達5.9厘及6.6厘，上望目標8.15元，維持「買入」評級。
DBS叫買佐丹奴
事實上，佐丹奴的確比Bossini行得更快，一早就開拓唔同年齡層、唔同檔次市場，最近同Pixar 3D動畫《怪獸大學》合作，推出男女裝T-shirt、polo shirt、恤衫等，仲搞埋網上訂購DHL送貨服務，品牌形象明顯高一層。
當然，《怪獸大學》對銷售有幾大幫助，暫時仲係未知數，不過以零售股嚟講，佐丹奴的確是一隻抗跌力頗強的高息股。
瑪姬兒