上兩周喺2.68元水平介紹華能新能源（958），目標價3.06元，噚日隻股因發盈喜而高見3.11元新高，個市大上大落佢自然有啲回吐，但都叫做達標！小弟揀958係因為歐洲股神安東尼波頓主理嘅富達基金反覆增持，近排又喺新能源板塊shopping，最新係上月尾以1.70元均價買入334.8萬股卡姆丹克（712），持股量去到5.01%嘅須披露水平。股神出手，加上增持價同現價1.76元唔係爭好遠，小弟決定跟多轉股神搵食！
光伏板塊係新能源股中最弱，皆因產能過剩問題未解決，中國同歐盟就關稅未傾掂數。不過有危就有機，唔係點會有平貨你買？
先講產能過剩，最終會出現汰弱留強局面，卡姆丹克肯定係留低嗰個。今年首季光伏業最差時，佢竟然可以扭虧為盈賺1,061萬元人仔，營收仲按年增9.5%，雖然產能過剩持續拖累產品跌價，期內毛利跌22%，毛利率降4個百分點至9.9%，但因為佢係龍頭先可以頂得住。仲有佢嘅大客係美國最大太陽能發電公司SunPower，佔銷售近七成半，客源咁穩定，產能過剩嘅問題應唔關佢事囉！
若破1.89元 睇兩蚊
另外，卡姆丹克積極增加產能，上月尾宣佈打算喺大馬興建太陽能晶綻及晶片生產線，總建築成本約1.15億元。咁嘅市況仲擴張，反映佢真係好多定單喺手，就算歐盟關稅問題傾唔掂數，都可以打made in Malaysia個牌頭。
至於中國同歐盟嘅關稅問題，冇得估，下月6號先有結果，不過幾肯定嘅係阿爺撐光伏板塊。總理李克強上月中喺國務院常務會議表示，會重點拓展分佈式光伏發電應用，最關鍵係會議紀錄話鼓勵金融機構採取措施緩解光伏製造業嘅融資困難。講到明「放水」，仲唔係撐？
無論經營環境同本身發展，卡姆丹克都係佔最佳位置，所以走勢上佢係最靚嗰隻光伏股，唔怪得歐洲股神捧場，短線睇吓可唔可以破到5月28日高位1.89元，如果得，兩蚊關冇走雞！
陳承龍
本欄逢周四刊登