是日傳媒界最hit話題，除咗新聞小花金枝慾孽，就係《信報》行政總裁羅燦起身走人。有行家同八方講，《信報》管理層一度想停咗練乙錚同戴耀廷嘅專欄，成為羅燦離職導火線。不過羅燦本人就向八方否認，話公司從來冇抽起過兩人專欄，亦唔打算叫停。
傳被和諧 做到冇癮
《信報》前日發內部通告，宣佈羅燦10月起辭任CEO，但會繼續做董事。據聞佢會過檔DBC數碼電台。據了解有人唔滿意資方「指手劃腳」，一味要和諧，所以做到冇癮。
八方向另一消息人士求證，佢話羅燦起身非一日之寒。《信報》近幾個月嘅廣告同銷量都唔太理想，令羅燦有壓力。CY就練總文章發律師信嘅風波亦係原因之一，「好多同事有好多意見，唔覺得應該道歉。」而練總嘅專欄文章今日會繼續喺《信報》刊登。
戴耀廷最初提出佔中構思，就係喺《信報》專欄，消息人士話戴耀廷嘅專欄確實好「惹火」，《信報》各級人員受到「各方面」壓力，上至西環，下至金鐘都曾經搵過佢哋「食飯」，話唔應鼓勵市民犯法。但係《信報》從來冇因為咁樣而干擾戴耀廷寫文。
八方問過戴耀廷，佢話《信報》冇叫過佢停專欄，編輯只係幫佢改吓錯字，冇審查佢啲文。近一、兩個月佢發現自己個專欄經常同反佔中文章並排一齊登，不過佢冇乜所謂。
消息人士又澄清，頭條財經網總監郭艷明將會過檔《信報》做總編輯，頂替轉搞網站、升做副社長嘅陳景祥。郭以前曾經喺《信報》做過，暫未有迹象顯示佢上場會改變辦報方針。據講《信報》已經物色咗猛人頂替羅燦，喺行內非常出名，不日內公佈。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange