鑽石可以價值連城，但理性去睇都係碳一嚿，唔好話升值，保唔保到值都成問題。不過周大福（1929）仲衰過鑽石，呢頭炒高一成，嗰頭就有大戶批股，一日搞掂，可想而知散水決心堅定，根本唔信周大福可以轉勢。
望住股價圖，唔信周大福都不無道理。隻股2011年底15蚊上市，市值1,500億成為一時佳話，不過上市後除咗2012年初掂過15蚊，之後未上過水面。
好聽就話彤叔眼光極準，摸頂技術一流，難聽就係彤叔再一次搵小股東笨。買番嚟已經貴，放出去就唔見一截；鑽石貴一貴買番嚟，都可以拎去晒命，買周大福真係唔知為乜。
話說回頭，彤叔都唔係第一次當小股東係水魚。新世界系股長期跑輸，以新世界中國（917）為例，99年上市價9.50元，一手股東長揸至今蝕七成，中間仲要供股兩次，至於蒙古能源（276）更係彤叔搵笨史上嘅神話。無數股民都衰過喺彤叔手上，你唔係仲信佢吖嘛？
Fifi
本欄逢周二、四刊出