羽絨股波司登（3998）可能想體現香港核心價值，噚日宣佈，搵咗位名為「廉潔」嘅仁兄做獨董！
廉潔呢個名字實在叫人印象難忘，華華亦好記得佢。話說波司登2007年搞上市時，高盛係保薦人之一，廉潔當時係高盛董事總經理，有份湊波司登呢個客。
六年前曾大力推介
廉潔當年仲對傳媒「曉以大義」，話波司登絕對唔會受到溫室效應影響，意指呢瓣生意好有前景。高盛賓架出名內歛，如此健談嘅高盛賓架實屬異類。
據波司登介紹，39歲嘅廉潔喺高盛香港投行部做董事總經理超過七年，2009至2010年過檔中金，家陣係私募基金春華資本集團合夥人。春華資本咪就係前高盛亞太區董事總經理、著名經濟學家胡祖六有份嘅私募基金。做得獨董，照計春華資本冇投資波司登喎。