內地上月出口轉跌3.1%，創44個月新低，消息一度令港股半粒鐘蒸發300幾點，情況都幾恐慌。不過，阿爺出口見紅，其實唔係壞事，起碼啲數字係反映事實，做假成份不再，證明整體經濟已重回正軌，雖然唔代表習李政府會因此手鬆，但再出狠招機會大減，為中港股市提供喘息機會，亦是噚日不跌反升嘅原因。
富士高（927）下半年業績差強人意，放榜後一瀉如注，曾低見2.10元，較5月高位唔見咗近五成，9 RSI一度跌穿20超賣區，加上噚日出現久違了嘅陽燭，技術上有力反彈。從基本因素看，富士高舊年下半年賺4,625.7萬銀，較上半年倒退32%，假設本年度業績與舊年下半年相若，現價市盈率都係僅10倍。市值唔夠10億銀，當中4億銀係cash，含金量極高，扣除現金後市盈率更低；去年共派息19仙，現價息率高達8.3厘，極具吸引力，亦證明已跌過龍。富士高昨收2.30元，升6%，以低位反彈0.236倍作目標，可見2.76元，市盈率都只係12倍。
唐牛