噚晚馬季煞科，立法會金融服務界議員張華峰，同香港證券學會會長李細燕都有馬仔出賽，可惜兩隻馬仔都唔多聽話，兩人冇得煞科拉頭馬影相，唯有留待下季開鑼。
「再創新高」跑包尾
張華峰贏到立法會議席，又埋咗經民聯堆，喺政壇開步發展算係不俗，可惜馬運一般，馬仔「創新高」表現普通，對上一次贏出已經係2010年底嘅事，張華峰呢兩季都冇拉頭馬。新到馬仔「再創新高」上月中因瘦肉精事件退出，本月初首度出賽輸咗，噚晚直情跑包尾。
咁啱港股最近chok住嚟跌，想創新高或者再創新高，睇怕都有啲難度，呢兩隻馬跑輸，可能都係配合股市走勢啫。
至於李細燕隻團體馬「新界福星」，就跑尾三。兩位金融界馬主想拉頭馬，要等下季了。