我早講香港最專業政客，首推鄉紳，呢班人在六、七十年代同英國佬交手，借力打力，遊走於內地與殖民地兩大權力中心之間，攞盡着數。六七暴動時投靠英國佬之新界西北鄉紳，一路獲英人扶持，由陳日新、張人龍到劉皇發，相反昔日支持暴動的荃灣鄉紳，今日都唔知去咗邊。
鄉紳之務實，在於眼中只有利益，理得你係乜水。今日堆填區擴建撥款危危乎，林鄭披甲掛帥，試圖利用自己與發叔多年交情乞票，正中了發叔下懷。兩人所謂交情，是上任政府主打十大基建，當中不少與新界西北有關，所以林鄭擔當發展局局長攻堅，曾蔭權背後給予無限支持，其中一個動作係將發叔委任入行會，當作政治酬庸，亦希望發叔運用其政治能力，助發展局推展工程，而林鄭幾個大項目，如東北發展、蓮塘口岸開發，全部要照顧鄉事利益。
開天索價 林鄭要跪低
所以林鄭落任前，臨尾搞單取締新界僭建，同鄉紳擘面，當時連官府中人也百思不得其解。原來當時唐唐大熱，提拔林D9當政務司，林鄭意興闌珊，準備告老還鄉，便親手整治鄉紳，摧毀雙方關係，令下手執個爛攤子，而自己亦得享不畏強權美名。殊不知往後發展出人意表，梁振英與「梁粉報」操作唐唐大宅僭建議題，林鄭成了「關鍵女士」，最後梁借僭建門成功誅殺唐唐，林鄭亦成第二把交椅，取林瑞麟而代之。
劉皇發本人受改朝影響，2011年受到反對勢力狙擊，無法連任屯門鄉事委員會主席，新政府也將行政會議職位改予大埔區出身兼民建聯成員張學明，發叔本人政治地位大不如前。當日林鄭大鑼大鼓搞新界村屋僭建，劉皇發身在建制，受盡激進鄉事勢力攻擊，兩邊不是人。今日如果林鄭仲以為靠昔日朋友關係，要發叔轉軚支持屯門堆填區擴建，得唔係唔得，開個價睇睇，好似屯門交通運輸基建、龍鼓灘搬村安排，本來前朝傾妥之利益補償，發叔pocket咗，但會再攞，總而言之，只有利益，冇朋友可言。風水輪流轉，今次輪到發叔成為「關鍵先生」，張學明完全幫唔到手。
689政府個勢咁弱，而政治上冷待劉皇發多時，鄉議局地位又俾新界社團、工商系統搶走，今次堆填區正好起啤兼發圍，開天索價，林鄭為保堆填區，以免成為壓跨梁振英最後一根稻草，根本冇議價能力，發叔個價幾高，「好打得」今次都要跪低。
添馬男