未到七月十四，各路猛鬼已搶先嚇人，講緊係全港首部4K製作，改編自李碧華小說嘅鬼片《迷離夜》！三個故事、三種驚嚇，而唯一共通處係採用4K專業級電影器材，包括Canon EOS-1D C、C500以及多款EF Cinema電影鏡頭；第一次做導演嘅華哥勁讚，呢部機唔只能應付低光環境，而且靈巧度高，方便捐窿捐罅，攝入骨灰龕都無難度！
記者：陳國輝 攝影：陳盛臣
任達華：鏡頭利 靈巧度高
做警察就多，今次拍鬼片，而且仲首次擔任導演，華哥話呢30日拍攝過程，每晚都瞓唔着：「拍《迷離夜》，令我覺得自己返回小時候嘅地方——灣仔東成戲院，傳聞嗰度好猛鬼，為投入角色，我將疑心生暗鬼的感覺，嘗試代入電影，搞到成日都瞓唔着。」
呢套電影除咗以鬼做題材，亦想表達另一樣嘢：「就係社會的變遷，好像買一個麵飽，由$4.5加到$6.5，不久租金又升，結果麵飽舖越執越多，為生活，個個變成行屍走肉。」
鬼片溝近年的社會和政治話題，故然有吸引力，但對首次用4K器材來拍電影，華哥也有一番體驗：「好鍾意用EOS-1D C來操刀，細細部、靈巧度高，放喺胸口，甚至夾喺腋下，就可輕鬆拍攝！」唔講唔知，其中一幕骨灰龕鏡頭，由於空間狹窄，故只有1D C先能夠攝入去拍；電影監製鄧漢強亦大讚，呢類4K器材可直接從片中擷取高清相，畫質好利，仲講笑咁話：「日後連影劇照嘅攝影師都唔使撈喇！」
強攻低光 鵝頸橋陰風陣陣
除了機身細小嘅EOS-1D C，同樣有份拍呢套電影嘅，還有專業級C500。兩者最大分別，不獨是體積以及重量問題，還有C500採用的是4K RAW格式，以不壓縮畫質嘅情況下拍攝，效果肯定更加靚！
除此之外，EOS-1D C同埋C500對於應付低光環境的表現亦特別好，例如拍攝陳靜與邵音音在鵝頸橋打小人一幕，導演並沒有作任何打燈安排，佢只係採用現場環境光源，配合周圍氣氛，便做出陰深而清晰嘅畫面效果，甚至乎可以慳番部份打燈成本費用！
《迷離夜》
片種：短篇鬼電影
導演：任達華、李志毅、陳果
演員：任達華、梁家輝、邵音音
上映日期：今日
必睇驚嚇位
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange