兩日前嘅「金手指」，孫柏文講過上個禮拜連盈警都發埋嘅美聯（1200）可冷敲。多謝大家支持，美聯喺我篇文出街後總共升超過一成，一洗我之前嘅烏氣！
噚日，同王弼、利世民同經營股票行前輩食晏傾起高爾夫球會粉嶺塊地。我就直頭話佢哋保洞無望。點解？原因唔難明，呢塊地170公頃，比七個跑馬地馬場大，仲要跑馬地馬場中場攞咗來做公眾運動場，當年我中學時啲校際足球就係喺嗰度踢。當年馬會會員仲係用真金白銀買咗佢哋喺跑馬地、沙田、雙魚河嘅會址，唔係以賤價每年問政府租。
粉嶺球場凍過水
再講，香港運動員其實有世界級嘅，收入媲美英超足球員，邊個推動？咪就係香港賽馬會囉！例如本地騎師蔡明紹（更唔講佢師傅告東尼），唔計策騎費，淨係講佢自己袋嘅嗰份獎金就有千萬元，高球會又出過乜高手呀？
佢哋塊地有三個18洞場，一個唔好彩會全部沒收。淨係有如柏林圍牆咁長嘅鐵絲網，有個進取啲嘅立法會議員，例如范國威咁，剪穿進入你old course第九個Par 5洞度玩佔領fairway，你仲唔死？
新加坡個SICC高球會，聽聞政府會喺2030年收番佢哋兩個18洞高球場。聽前輩話個會籍已由30幾萬星紙，跌到得20萬。你香港高球會可能得12個月通知，就會由三個半變得番深水灣嗰半個場時，現賣過千萬嘅會籍將會跌到七個一皮。
佢哋已冇嘢可做，𠵱家任何行動都會令人覺得佢哋後知後覺為私利。佢哋冇建過道德高地去炮轟對手，亦冇可能喺個場同對手開戰。到𠵱家出路得兩個：一係三個場還出一、兩個，求神能擺平；一係就做我相信佢哋會做嘅，就係將成個東北發展推倒。機會有幾高？仲唔一注獨沽高球會籍？
孫柏文
獨立股評人
http://facebook.com/shuen
本欄逢周二、四刊出