阿爺打假，進出口數據原形畢露，加上要調整增長結構，由谷投資轉為刺激消費，唔會亂放水救市，導致金融體系出現錢荒，民企冇得再債冚債，爆煲潮一觸即發。國家轉型同員工再培訓一樣，都會有一段低潮期，難捱但方向正確。魏力身邊唔少戰友都炒到意興闌珊，但世界那麼大，跳出中港股市，開番個e-trade戶口，或者投資追蹤其他股市的ETF，就會發現另一片天地，不必灰心。
市況雖爛，仍有神勇的股份，5月底推介的珠江船務（560），完全不理大市升跌，個半月爆足五成，堪稱奇蹟。由於冇消息跟尾，估頂相當困難，有貨戰友唔貪心的話，3蚊關前可先食糊，反正炒股不能賺盡，留點水位無妨。
另外，日前推介的同仁堂國藥（8138）順利破頂創新高，未買可趁調整吸納，量度升幅約為15蚊。
股票要升，績佳是最有力護身符，SUV大受歡迎，長城汽車（2333）首季營收達18億人仔，高於預期的16.5億人仔。上季總銷量18.7萬輛，按年升38%，加上今明兩年都有新車推出，有助維持盈利增長動力。彭博預期今年長汽純利可增27%，預測PE僅11倍，明年更降至9倍，增長高而估值平，創新高可期，目標先睇40蚊。
魏力
http://www.facebook.com/2012jason
本欄逢周一、二、四、五刊出