中國電力（2380）董事長李小琳畀人嘅印象，一就係佢阿爸係前總理李鵬，二係佢每次出現都一身珠光寶氣。佢最近接受《大公網》專訪時，竟大談家庭觀，罕有地流露出感性一面，指人生中最遺憾嘅事，係只得一個孩子。
李小琳直言，「如果能有第二個孩子就好了」，可惜內地奉行「一孩政策」，李鵬曾經同佢講，如果領導人嘅仔女都唔認真執行國家政策，邊個仲會去執行呢？所以佢認為「我們這代人也是付出的一代」。
囡囡已大學畢業
李小琳育有一女，現已長大成人，大學畢業。回想阿女小時候，李小琳話無論多忙，每日都會抽兩小時單獨陪阿女。阿女升大學時，曾經召開家庭會議，李小琳認為阿女喺文學、藝術方面有天份，讀新聞最啱，但阿女堅持讀國際金融，佢亦尊重阿女嘅選擇。
老實講，如果李鵬外孫女走去做記者，咁就真係新聞嘞。